شاندی هەرێمی كوردستان بە سەرۆكایەتیی نێچیرڤان بارزانی، سەرۆكی حكومەتی هەرێمی كوردستان، لە هەریەك لە قوباد تاڵەبانی جێگری سەرۆكی حكومەت، كەمال موسلیم وەزیری ئەوقاف و كاروباری ئایینی، فەلاح مستەفا بەرپرسی پەیوەندییەكانی دەرەوە و سەفین دزەیی، گوتەبێژی فەرمیی حكومەتی هەرێمی كوردستان پێكهاتبوو.
سەفین دزەیی، گوتەبێژی فەرمیی حكومەت بە تۆڕی میدیایی رووداوی راگەیاند، لە كۆبوونەوەكەدا باس لە پەیوەندییەكانی ئیتاڵیا و هەرێمی كوردستان كراوە و ئیتاڵیا ئامادەیی دەربڕیوە بەردەوامبێت لە هاوكاریكردنی هەرێمی كوردستان. گوتیشی:" لە كۆبوونەوەكەدا باس لەوەشكرا كە نووسینگەی ئیتاڵیا لە هەولێر بكرێتە كونسوڵییە".
بەپێی راگەیێندراوێكی حكومەتی هەرێمی كوردستانیش، لەو كۆبوونەوەیەدا، نێچیرڤان بارزانی سوپاس و پێزانینی خەڵك و حكومەتی هەرێمی كوردستانی بۆ پشتگیری و پشتیوانیی مرۆیی و سەربازیی ئیتاڵیا بۆ هەرێمی كوردستان دووپاتكردووەتەوە.
پوختەیەكیشی دەربارەی رەوشی هەرێمی كوردستان و پێشڕەوی و سەركەوتنەكانی بەردەوامی پێشمەرگە و رەوشی ئاوارە و پەنابەرانی لە هەرێمی كوردستان خستووەتەڕوو، كە بارێكی قورسیان خستووەتە سەر شانی حكومەتی هەرێمی كوردستان و پێویستی بە یارمەتی و هاوكاریی زیاتر هەیە.
لە بەرامبەریشدا سەرۆكوەزیرانی ئیتاڵیا رایگەیاندووە، كە ئیتاڵیا لە هەموو رووێكەوە زیاتر لە جاران هاوكاریی هەرێمی كوردستان دەكات،" چونكە هەرێمی كوردستان بە شوێنێكی ستراتیژی دەبینین و خۆمان بە دۆستی گەلی كوردستان دەزانین، بۆیە ئیتاڵیا بڕیاریداوه ئاستی نوێنەرایەتیی خۆی لە هەرێمی كوردستان بۆ كونسلخانەی گشتی بەرز بكاتەوە و بەمەش دەمانەوێ پەیامێك بدەینە هەمووان كە ئێستا رەوشی هەرێمی كوردستان لە جاران باشترە". گوتووشیەتی "بۆ ئێمە گرنگە ئەو سەقامگیرییەی لە كوردستان هەیە، بەردەوامبێت".
لە بەشێكی دیكەی دیدارەكەدا پەیوەندییەكانی نێوان هەولێر و بەغدا، بارودۆخی موسڵ و ناوچەكە بەگشتی ، چۆنیەتیی بەرەنگاربوونەوەی تیرۆر و ئۆپەراسیۆنە سەربازییەكان، پەرەپێدانی پرۆسەی سیاسی لە عێراق و گرنگیی بەشداری و هاوبەشیی هەموو پێكهاتەكان لە پرۆسەی سیاسیی وڵاتدا تاوتوێ كراوە. تیشكیش خراوەتە سەر بارودۆخی سووریا و كاریگەریی پێشهاتەكانی ئەوێ لەسەر رەوشی عیراق و ناوچەكە بەگشتی، جەختیش لەسەر پێویستیی چارەسەرێكی سیاسیانە بۆ كێشەی سووریا كراوەتەوە.
هیچ نظری موجود نیست:
ارسال یک نظر