سەرۆکی هەرێمی کوردستان جەختدەکاتەوە کە هێزی پێشمەرگەی کوردستان لە زۆر شوێن هێرشەکانی چەکدارانی داعشیان تێکشکاندووەو دەڵێ "ئەم شەڕە بۆ کوردستان شەڕی مان و نەمانە بەرانبەر هێزێک کە پێشتر سوپای دوو وڵاتی تێکشاندووە و پێشکەوتووترین چەکی ئەو دوو سوپایەی بۆ پەلاماردانی کوردستان کەوتە دەست".
بارزانی لە پەیامێکدا کە بەبۆنەی هاتنەوەی جەژنی قوربانەوە بڵاویکردووەتەوە پیرۆزبایی لە خەڵكی كوردستان و هەموو حیزب و لایەنە سیاسییەكان و سەرجەم موسڵمانانی عێراق و جیهان دەكات.
بارزانی لەو پەیامەدا دەڵێ : "هێزی پێشمەرگەی کوردستان ئێستا بە نوێنەرایەتیی هەموو مرۆڤایەتی شەڕی ئەو هێزە تیرۆریستییە دەکات و بەهۆی بەها بەرزەکانی پێکەوەژیانی ئاشتییانە و بڕوابوونمان بە دیموکراسی و ئازادی هاوپەیمانێتییەکی نێودەوڵەتی بۆ پشتیوانییکردن لە گەلەکەمان هاتەکایەوە و خۆشبەختانە ئێستا ئەو هاوپەیمانێتییە هەوڵەکانی بۆ ڕیشەکێشکردنی تیرۆریستان چڕ کردۆتەوە".
دەقی پەیامەکەی بارزانی
بە ناوی خوای مەزن و دلۆڤان
بە بۆنەی هاتنەوەی جەژنی قوربانی پیرۆز، پیرۆزبایی لە خەڵكی كوردستان و هەموو حزب و لایەنە سیاسییەكان و سەرجەم موسڵمانانی عێراق و جیهان دەكەم. پیرۆزبایی شەرەفی بەرگریكردن و قوربانیدان لە خانەوادەی ئەو شەهیدە سەربەرزانە و پێشمەرگە قارەمانەكان دەكەم كە بە گیانی پیرۆزی خۆیان كوردستان و بەها پیرۆزەكانی مرۆڤایەتیان پاراست و دەیپارێزن.
جەژنی ئەمساڵ لە کاتێکدایە کە گەل و وڵاتەکەمان لە شەڕێکی چارەنووسسازدایە بەرانبەر تیرۆریستان و پێشمەرگە قارەمانەکانمان ڕۆژ لە دوای ڕۆژ سەرکەوتنی گەورە بەسەر تیرۆریستاندا تۆمار دەکەن. ئەم شەڕە بۆ کوردستان شەڕی مان و نەمانە بەرانبەر هێزێک کە پێشتر سوپای دوو وڵاتی تێکشاندووە و پێشکەوتووترین چەکی ئەو دوو سوپایەی بۆ پەلاماردانی کوردستان کەوتە دەست، بەڵام پێشمەرگە گیانلەسەردەستەکانی کوردستان توانیان لە بەرانبەریاندا بوەستن و لە زۆر شوێن تێكیانبشكێنن.
هێزی پێشمەرگەی کوردستان ئێستا بە نوێنەرایەتیی هەموو مرۆڤایەتی شەڕی ئەو هێزە تیرۆریستییە دەکات و بەهۆی بەها بەرزەکانی پێکەوەژیانی ئاشتییانە و بڕوابوونمان بە دیموکراسی و ئازادی هاوپەیمانێتییەکی نێودەوڵەتی بۆ پشتیوانییکردن لە گەلەکەمان هاتەکایەوە و خۆشبەختانە ئێستا ئەو هاوپەیمانێتییە هەوڵەکانی بۆ ڕیشەکێشکردنی تیرۆریستان چڕ کردۆتەوە.
هیوادارم ئەم جەژنە ببێتە مایەی سەرکەوتنی زیاتری گەلەکەمان و كوردستانیش لە پێشکەوتن و ئاوەدانی و ئارامی بەردەوام بێت.
مسعود بارزانی
سەرۆكی هەرێمی كوردستان
9 ذوالحجە/1435ـی كۆچی
3ـى تشرینی یەكەم/ 2014 زایینی
هیچ نظری موجود نیست:
ارسال یک نظر